Ministri i Punëve të Brendshme, Oliver Spasovski mohon se emri i tij është në lojë për kryeministër teknik.

Sipas tij, emri i kryeministrit teknik do të zbulohet nga vet kryeministri Zaev. Spasovski shton se deri në formimin e Qeverisë teknike 100 ditë para zgjedhjeve, do të fokusohet në zbatimin e reformave në MPB.

Përveç emrit të Spasovskit, po spekulohen edhe me emrat e ministres së Punës dhe Politikës Sociale, Mila Carovska, ministren e Mbrojtjes, Radmilla Sheqerinska dhe me zëvendëskryeministrin Koço Angjushev, përcjell Telegrafi Maqedoni.

As partia opozitare maqedonase OBRM-PDUKM e cila nga 3 janari deri 12 prill do të udhëheqë MPB-në nuk ka menduar për emrin e ministrit. Nga partia e Hristijan Mickoskit thonë se organet partiake ende nuk kanë vendosur se kush do të udhëheqë me policinë dhe me Ministrinë e Punës dhe Politikës Sociale.

Në kuadër të Qeverisë teknike, opozita do të ketë edhe zëvendësministër në Ministrinë e Bujqësisë, Financave dhe Shoqërisë Informatike dhe Administratës.

Me propozim të kryeministrit, Qeveria emëron zëvendësministra shtesë në MPB, Ministrinë e Punës dhe Politikës Sociale, Ministria e Financave, Bujqësi dhe Shoqëri Informatike, ndërsa ministrat që i propozon opozita kanë autorizime të kufizuara. Vendimet duhet të përkrahen edhe nga ministri teknik dhe nga zëvendësministri.